الشعر الشعبي

بيبي حبيبي

ولدي الحبيب ولدي
فلذة كبدي ،
أنا قلبي عليك مشغول
أمانة عليك يا ولدي
ما تخلي البعاد يطول
يا حِته مني ، يا ضنايا
يا نور عيني ، أمانة عليك يا ولدي
ما تخلي البعاد بينا يطول
وخلي حبل الوداد ما بينا
دايماً بينا بالحب موصول

ليه يا ولدي آسي عليَّ
وحارمني من عطفك
وحارمني من حنانك
ليه يا ولدي ناسي أبوك
أمانه يا ولدي تعالى طل عليَّ
وبلاش الآسية دية
وبلاش بعاد وعناد
وارحم دموع عينيَّ
واسأل عن أبوك العيان

ولدي الحبيب ولدي
فلذة كبدي ، يا ولدي
يا ضناي ، يا عمري
أنا مش عاوز منك حاجه
مستورة معايا ومش محتاجه
غير شوية عطف منك
على حبة حنان منك
واهتمام يا حبيبي منك
ومثل ما رعيتك وديتك ،عمري
تراعي شيبتِ ، وضعفي ، وكبر سني
يا ولدي ، يا حِته مني
يا حبيب قلبي
تعالى وطُل عليَّ
واسأل عن أبوك التعبان

فاكر زمان يا حبيبي
لما كنت صغير “بيبي”
كنت معايا لليل ونهار
كنا بِنضحك سوى ، مع بعض
وما نبطلـ ش لعب وهزار
وكنت بتجري عليَّ
فارد ليا أديك
أشيلك ، وأحضنك في باطي
وعلى كتفي ياما شلتك
وفي نن عيني من جوه شلتك
وفي قلبي يا قلبي أنا ياما شلتك
وراعيتك ، واديتك عطفي وحناني
واديتك كل حياتي، يا حياتي
تعالى وطُل عليَّ
واسأل عن أبوك التعبان

دانا ياما سهرت عشانك
تبكي أقول لك حبيبي مالك
يا ضنايا مالك
وفي حجري أنومك
وأخدك معايا أفسحك
وبأيدي أوكلك ، أشربك
ولما كنت بتضحك
كانت الدنيا كلها بتضحك
وقلبي يرفرف من السعادة
زي اليمامة من غير جناح
وأبقى مبسوط فرحان مرتاح
ولما كنت تشكي يا حبيبي
وتقول يا بابا أنا تعبان
أجري بيك في كل مكان
زي المجنون ، والعقل منه جنان
وراعيتك ، واديتك عطفي وحناني
واديتك كل حياتي ، يا حياتي
وحلمت وتمنيت أشوفك في الدنيا تكبر
وأشوفك في الوجود أعظم إنسان
عشان تشيلني وتراعيني لما أكبر
وتيجى حبيبي ، تعالى حبيبي ، وطُل عليَّ
واسأل عن أبوك الغلبان

هو ده يا ولدي آخرة معروفي معاك
ووصية ربنا لك بالوالدين
طاب قول لي عملت لك ايه
عشان تأسى علي بالأوي
ولدي الحبيب ولدي
يا ولدي، يا ضنايا
ولدي أنا قلبي عليك غضبان
واشتكيتك يا ولدي للرحمن
أنا مش بشحت منك عطف وحنان
ولا هقول لك شيلني مثل ما شلتك زمان
لا لا لا أنا بقول لك قلبي عليك غضبان
ولا أقول لك أنا مسامحك ، من قلبي مسامحك
وبدعي لك لليل ونهار ــ ربنا الرحمان ــ
يكفيك شر نفسك ، والشيطان
وينصرك ، ويحميك ، ويراعيك
ويهديك عليَّ ، وتيجي تسأل عني
وترحم أبوك التعبان
أنا عاوز منك حبة حنان
وشويت حب
على حبة عطف ، وحبة اهتمام
و تيجي تسأل عن أبوك التعبان

السابق
الدخول المدرسي
التالي
تصدُّع

اترك تعليقاً