الشعر الشعبي

مولانا

دندن دندن على عودك
وإقتل بالغنوة حسُودك
الكلمة دايمًا باقية
واللي يحبك هيعودك
دندن غنّي يا مولانا
صوتك جابنا وودانا
خلاّنا نحس بروحنا
ولنور الثورة هدانا
غني وسلطن آه يا عم (إمام)
صَحي قلوبنا علشان نايمة
خلّي طريقنا يمشي لقدام
رسّي مراكب علطول عايمة
للحق هتبقى طريق وإمام
والراية هتفضل بيك قايمة
وبصوتك اللي في مرة ما نام
هتفتّح دُنيتنا الغايمة
الكلمة اللي حبسوها زمان
رغم عنادهم لسة حية
والصوت اللي ف مرة كتموه
بدل الواحد جالهم مِية
والشعب اللي ياما سرقوه
أكلوا عيشه وشربوا المَية
الشعب مسيره ف يوم هيثور
والثورة بتاعته دي قوية
على صوت العود
نرجع ونعود
ونبشر بقدوم ثورتنا
الحق مسيره ف يوم هيعود
بالحق هتكمل فرحتنا
وشبابنا هيجمد زي العود
بشبابنا هترجع قوتنا
وبلدنا هتفرح باللي يعود
وهنبني مع بيوتنا

السابق
الدهنة
التالي
إلهام

اترك تعليقاً