-انا دكتور التخدير ..حتحس شكه صغيره ..قول ورايا…بسم الله…الرحمن …الرحييييم.
-اكيد التخدير مش كويس…انا لسه ما نمتش لكن مش حاسس بحاجه …يمكن دي الحقنه اللي بتعمل شلل.
-ايوه …هو ده اللي اتفقنا عليه …الكليتين مطلوبين في دسلدورف و اوهايو , و القلب لتكساس و الكبد لجنوا…القرنيتين تتحط في التلاجه لغايه ما يجيلهم طلب.
-صوت دكتور صلاح …و انا اللي كنت فاكره صاحبي و استئمنته علي نفسي..ازاي تعمل كده يا صلاح …تبيعني حته حته…لو كنت عاوز فلوس كنت قول ..خلاص انا رحت بلاش.
-حمد لله علي السلامه.
-سلامه …سلامه مين …يا حرامي الاعضاء…هو انا لسه عايش بعد ما فضيتوني و اخدتوا كل حاجه …مكانش العشم .
-انت مسكين و حتفضل مسكين …الخراج اللي في صباعك كان ممكن افتحه في العياده و من غير بنج لكن انا عارفك خواف و ممكن تعملي فضيحه فقلت سنه بنج ونخلص لكن السنه دي كان سرها باتع.